Joh 14 | WSK | STEP | Jesus ko olekem nunga maonam, “Nina ikia tawun biya me ninga moruk se nengemang me batagukko. Nina Kaem ko nengemang ningi nunguning arukko, se ani ago ko nengemang ningi nunguning arukko.

John 14

Jesus te Kaem kote namanakko

1 Jesus ko olekem nunga maonam, “Nina ikia tawun biya me ninga moruk se nengemang me batagukko. Nina Kaem ko nengemang ningi nunguning arukko, se ani ago ko nengemang ningi nunguning arukko. 2 Aninga Ait ko kawam ningi kuwim suen biya. Buta mena ale mu, ani ulengkala ninga manem ale. Bare kuwim suen biya, se ani namirik nenenga nigiwim nungekko. 3 Nigiwim nungek asele pelerik tairik ale ninga giek nengerak kuwim ani te bagasam mu te namirikko, se nina ani agarak bagaralko. ^{▼▼John 14:3 Jesus ko kariimet nu ilak bagomonko: John 12:26; 17:24; 1 Thes 4:17.} 4 Nina lage wonong ani te namirikko mu ko ikisan.”

5 Jesus buta balam se Thomas nu maonam, “Kari Biya, ana ni apareyate namasam mu me ko ikisam. Buta se ana awuk ta lage ni te namasam mu ko ikinakko?”

6 Se Jesus balam, “Ani agata lage, se ani agata den nunguning ko duap, se marak nunguning ko duap. Kari bo ta aninga kiaruk ale kota Ba kote namurukko me terong mam. 7 Nina ani ninguru aga ikisan, mu nina aga Ait ago ko ikisan. Se aitak nina ko ikisan. Ale nina nu aringiman.”

8 Se Philip nu maonam, “Kari Biya, ni ka Niet nanga kasuru se aringinak mu asele ana ko ikinakko terong mam.”

9 Se Jesus balam, “Philip, tom maiya biya ani nengerak lagerem bare ni ani me aga ikisam e? Awiriya ani agarkoso mu nu aninga Ait karogo arigiso. ^{▼▼John 14:9 Awiriya Jesus arigiso mu nu Nuet ago arigiso: John 12:45; Col 1:15; Heb 1:2-3.} Se ni awuk se balem, aninga Ait ninga kausekko balem? 10 Ani aga Ba ilak, se Aga Ba ani agarak, mu ni mu ko gemang ningi nunguning agi mena? Den ani ninga manarukasam mu ani aga ikia te me balukasam, mu aninga Ba ani agarak mu ko ura ani te beteso. 11 Den ani balsam, ani aga Ba ilak, se aga Ba ani agarak, mu aninga den mu ko nengemang ningi nunguning arukko. E mena mu kilek kasa ani bitakasam mu ko ikia tal ale ani ago ko nengemang ningi nunguning arukko.

12 “Ani nunguningta ninga manorsam, awiriya ani ago ko gomang ningi nunguning aram, mu kilek ani betesam turantala sokel ago bitirukko. Nu kilek ani betesam mu kiaruk ale sokel ago nunguningkiri bitirukkowo! Mu awuk, aninga Ba kote namasam. 13 Se nina aninga aip te anapeya mel ko balal mu ani bitirikko. Mu te ani aga Ba ko nup biya nikitang ago mu wetang te bitirikko. 14 Nina aninga aip te anapeya mel ko balal mu ani bitirikko.”

Korang Bur tai kapurukko den

15 “Nina aninga kuesan agi mu aninga agiring karo tualko. ^{▼▼John 14:15-17 Jesus kuring karo tua: 1 John 5:3. Korang Bur Kris alo nongorak bagurukko: John 15:26.} 16 Se ani aga Ba aru manik se Saonga bo bitiruk se tai kapuruk, ale tom suen biya nina nengerak bagurukko. 17 Mu nu Korang Bur, Den Nunguning Bala ko Kari. Ali imi ko kariimet Saonga Kari mu tamonko me terong, mu awuk, nuna nu me arigisan ale me ko ikisan. Bare nina nu ko ikisan, mu awuk, nu ninga ningi bagoso, ale maingte nina suwan suwan nengemang ningi bagurukko.

18 “Ani nina me ninga awurek se kuriang marmar nunam nonet mena iwita me bagaralko. Mena. Mu ani nengete tairikko. 19 Tom katirta aniso se ani namirik se ali imi ko kariimet tom bo ago me agarkomonko, bare nina mu asele ani agarkalko. Ani marak bagasam se nina betela marak bagaralko. 20 Tom mu tairuk mu nina ani Ait ilak bagasam se nina ani agarak bagasan se ani nengerak bagasam mu ko ikialko. 21 Awiriya aninga den ikiso ale karo tuso, mu kari umutang aninga kueso. Se kari aninga kueso, mu aninga Ba noko kueruk, se ani betela noko kuerik ale kote aratik se agarkukko.”

22 Jesus iwita balam se Judas bo, Iscariot kari mu mena, mu nu isuam, “Kari Biya, awuk se ni ana namakete nimi wetang te bitar se karkanak, bare ali imi ko kariimet me karkomonko balsam a?”

23 Se Jesus noko den koma balam, “Awiriya aninga kueso, mu aninga agiring karo tuokko. Se aninga Ait nu ko kuerukko, se aga Ait ilak nu kote tainak ale tom suen biya ilak baganakko. ^{▼▼John 14:23 Kariimet Jesus ko kuesan mu ilak bagomonko: Eph 3:17; Rev 3:20.} 24 Awiriya ani me aga kueso, mu nu aninga agiring me karo tuso. Den nina ikiman imi mu ani agata aga den mena. Mu aga Ait aninga beteram se tairem wore ko den.

25 “Ani nina nengerak baga se mel imi ko den ninga manarukasam. 26 Bare nenenga Saonga Kari Korang Bur mu aninga aip te aga Ba bitiruk se nenengate tai kapuruk ale mel suen biya ninga kausokko. Ale ikia ningaruk se den suen biya ani ninga manarukasam mu ko ikia talko.

27 “Ani nenenga bitirikko se ani angamang lila te bagaralko mu ningarsam. Aninga angamang lila imi mu ali imi ko kariimet nononga nongomang lila iwita mena. Nina ningamin me yeneruk se me nguangaralko. ^{▼▼John 14:27 Jesus ko gomang lila nungaram: John 16:33; Phil 4:7; Col 3:15.} 28 Den ani ninga bitirik bare aking pelerik nengete tairikko mu ani maingkala ninga manem se ikiman ale ko nengemang batagoso. Bare nina ani ago ko kuesan agi mu, nina ani aga Ait kote namasam mu ko amilmilaralko, mu awuk, aninga Ait mu aninga kiaram se ani noko bowa ningi. 29 Mel imi me aratoso se ani ninga manorsam. Se udagi mel imi aratuk mu nina te nengemang ningi nunguning arukko.

30 “Ani den suen biya me nengerak balikko. Mu awuk, ali imi ko supuling ^{▼▼John 14:30-31 Jesus mu Satan ko baluwoso.} aningate tairukko tom pingi aram. Nu kota angimik te mel bo bitirukko me terong mam. Bare aninga angamang ali imi ko kariimet te ikimon, aninga Ait ko kuesam ale mel suen biya bitirikko aga manarso mu betesam. Buta se barasal se namanakko.”

31